Ўзбекистон Хотин-қизлар қўмитаси томонидан ҳамкор ташкилотлар билан биргаликда Ватанимиз мустақиллигининг 26 йиллиги ҳамда 12 август — Халқаро ёшлар кунига бағишлаб ўтказилиши режалаштирилган лойиҳа — «Ёш оилалар ва қизлар» биринчи республика форуми айнан уюшмаган ёшларнинг орзу-интилишларини ўрганиш, уларни оилага, жамиятга муносиб инсонлар этиб камолга етказишга муносиб ҳисса қўшишдек мақсадларни кўзлайди.

8 — 12 август кунлари бўлиб ўтадиган мазкур ижтимоий-маърифий ҳафталик доирасида Сингапур менежментни ривожлантириш институти биносида «Мен ҳам етакчи бўламан!» мавзуидаги маърифий учрашув, «Фан-таълим — келажак пойдевори» мавзуидаги давра суҳбати, «Оилам китоб ўқийди», «Соғлом турмуш тарзи» акциялари ташкил этилади. Форумнинг якуний босқичида Хотин-қизлар қўмитасининг 2017 — 2021 йилларга мўлжалланган «Ёш оилалар ва қизлар билан ишлаш бўйича стратегияси» тақдимоти, тўй-ҳашамларни исрофгарчиликларсиз ўтказишга оид тадбирлар, «Қизларжон» клубининг очилиши, «Интернетдаги таҳдидлардан ҳимоя» китобининг тақдимоти ҳам кўзда тутилган.