2017 йилнинг биринчи ярмида Ўзбекистон истеъмолчилар ҳуқуқларини ҳимоя қилиш жамиятлари федерацияси ва унинг ҳудудий тузилмаларига фуқаролардан 5 минг 725 та мурожаат келиб тушган. Уларнинг 5 минг 258 таси ижобий ҳал этилиб, истеъмолчилар фойдасига 2 миллиард сўмдан ортиқ етказилган зарар қайта ҳисоб-китоб қилинган.

Андижонда мазкур федерациянинг 2017 йил биринчи ярим йиллик фаолияти якунларига бағишлаб ўтказилган сайёр йиғилишида маълум қилинишича, «Халқ билан мулоқот ва инсон манфаатлари йили» Давлат дастури ижроси доирасида федерация ва унинг барча даражадаги тузилмалари ҳузурида «Истеъмолчи билан мулоқот» ҳуқуқий маслаҳатхоналари ташкил этилди. Маслаҳатхоналарга 6 ой ичида 2 минг 835 та мурожаат тушган. 2 минг 175 нафар истеъмолчига қонун талабларидан келиб чиқиб, ҳуқуқлари тушунтирилди, 300 дан ортиқ мурожаат юзасидан давлат ва назорат қилувчи, суд органларига мурожаат қилиш бўйича ҳуқуқий маслаҳат берилди, дейилади ЎзА ахборотида.