Ҳозир бутун дунёга экстремизм, терроризм, «оммавий маданият» каби таҳдидлар хавф солиб турган бир пайтда, ёш авлодни бундай балолардан ҳимоя қилиш учун, энг аввало, улар онгида мафкуравий иммунитетни шакллантириш лозим. Шу мақсадда бугун мамлакатимизнинг барча муассасаларида аср офатларидан огоҳ бўлиш учун турли тадбир, давра суҳбатлари ташкил этилмоқда.

Сурхондарё вилояти Ангор туманидаги ҳарбий қисмлардан бирида бўлиб ўтган шундай тадбир «Оила муқаддас қўрғон, уни асраб-авайлаш барчамизнинг вазифамиздир» деб номланди. Ҳарбийлар, уларнинг оила аъзолари, маҳалла фаоллари, Бандликка кўмаклашиш маркази вакиллари, имом-хатиблар, тумандаги кўп тармоқли шифохона шифокорлари иштирок этган тадбирда диний экстремизм, терроризм, ахборот хуружлари ва ижтимоий ҳаётда рўй бераётган салбий ҳолатлар юзасидан маълумотлар берилди. Шунингдек, «Терроризм аср балоси» ва «Ҳаёт учун беш дақиқа» мавзусидаги ҳужжатли фильмлар намойиш этилди.

— Давра суҳбатидан, айниқса, ёшлар ўзи учун фойдали маълумотлар олди, — дейди ҳарбий қисм хизматчиларининг оила аъзолари билан ишлаш бўйича етакчи мутахассиси ­Дилбар Деворова. — Қисқа метражли ҳужжатли фильм ҳам барчада катта таассурот қолдирди. У яхшини ёмондан, оқни қорадан яна бир бор ажратиб олишга кўмаклашди.

Баҳром МИРЗААКБАРОВ,

Ҳарбий қисм командирининг ўринбосари, подполковник