Жамиятда қонун устуворлигини таъминлаш ҳуқуқий маданиятнинг юксалишига боғлиқ. Бу борадаги ҳуқуқий тарғибот ишларини юритишда оммавий ахборот воситаларининг ўрни беқиёс.

Адлия вазирлигида ўтказилган «Ҳуқуқий тарғибот ва мулоқот минбари» мавзусидаги конференцияда шу ҳақда сўз юритилди. Бугун мамлакатимизда амалга оширилаётган кенг кўламли ислоҳотлар, суд-ҳуқуқ соҳасидаги янгиликларни халқимизга таъсирчан воситалар ёрдамида етказиш, аҳолининг ҳуқуқий онг ва тафаккурини бойитиш муҳим вазифалар сирасига киради. Анжуманда ҳуқуқий соҳага ихтисослашган нашрлар қабул қилинаётган қарор ва фармонларнинг мазмун-моҳиятини одамларга содда ва равон тилда етказишда самарали фаолият юритиб келаётгани таъкидланди ва бу борадаги ютуқ ва камчиликлар Адлия вазирлигининг нашри — «Инсон ва қонун» газетаси мисолида атрофлича таҳлил қилинди.