Ўзбекистон Президентининг фаолияти, ташрифлари, умуман, мамлакат ижтимоий-сиёсий ҳаётидаги ўзгаришларни, давлат аҳамиятига эга масалаларни ёритишда илгари асосан саноқли расмий оммавий ахборот воситаларига таянилган бўлса, эндиликда уларнинг сафини янада кенгайтириш, хусусий босма ва электрон нашрлар билан ҳам ҳамкорлик кучайтирилиб, бу жараёнга жалб этилиши кўзда тутилмоқда.

Миллий матбуот марказида Ўзбекистон Республикаси Президентининг матбуот котиби Асад Хўжаев ҳамда давлат бошқарув органлари — барча вазирлик ва қўмиталар матбуот котибларининг журналистлар учун ўтказилган илк мулоқотида бу алоҳида қайд этилди. Эндиликда қабул қилинаётган муҳим қарор ва фармонларнинг аҳамияти, моҳияти, ижроси ҳамда давлат ва жамиятимиз ҳаётига оид барча янгилик ва ўзгаришлар хусусида матбуот котибларининг ОАВ вакиллари билан очиқ мулоқотлари  мунтазам ташкил қилинади. Оммавий ахборот воситалари ишончли хабар, ахборот ва шарҳлар билан таъминлаб борилади. Журналистларнинг Президент матбуот котиби ва давлат бошқарув органлари матбуот хизмати вакилларидан ҳар қандай саволга жавоб олиш имконияти яратилади.