Ўзбекистон Республикаси Вазирлар Маҳкамасининг 2017 йил 15 мартдаги «Умумий ўрта таълим тўғрисидаги низомни тасдиқлаш ҳақида»ги ҳамда 2017 йил 6 апрелдаги «Умумий ўрта ва ўрта махсус, касб-ҳунар таълимининг давлат таълим стандартларини тасдиқлаш тўғрисида»ги қарорларига мувофиқ, энди мактабларда бир синфдаги ўқувчиларнинг сони 35 нафардан ошмайди.

Халқ таълими вазирининг биринчи ўринбосари Бахтиёр Данияровнинг айтишича, биринчи синфга тиббий хулоса асосида олти ёшдан қабул қилиш жорий этилади. Бунда тегишли йилнинг 31 августига қадар фарзанди 6,5 ёшга тўлмаган, биринчи синфда ўқитиш истагини билдирган ота-онанинг боласи билан умумтаълим муассасасининг педагог ходимлари ва психологлари уни мактабда ўқишга жисмонан ва руҳан тайёрлаш бўйича тушунтириш ишларини олиб боради.

Бундан ташқари, замон талабларидан келиб чиқиб, ўқувчиларда информатика, ахборот технологиялари фанининг дастлабки тушунчаларини шакллантириш мақсадида 1-4 синфларда математика фанига дастурлашнинг дастлабки тушунчалари татбиқ этилди. Ўқув режасидаги «Информатика ва ҳисоблаш техникаси асослари» фани «Информатика ва ахборот технологиялари», деб ўзгартирилди ҳамда 5, 6, 7-синфларда ушбу фандан юкламалар ҳафтасига 0,5 соат ҳажмда давлат компонентидан ажратилди.

Шунингдек, ўқувчиларни касб-ҳунарни тўғри танлашга йўналтиришни назарда тутган ҳолда «Меҳнат таълими» фани ўқув режада «Технология» фани деб ўзгартирилди ҳамда бугунги кун талаблари асосида кўп тармоқли йўналишга ҳамоҳанг ҳолда қайта ишланди.