Фуқароларнинг ўзини ўзи бошқариш органлари фаолиятини мувофиқлаштириш бўйича ўтказилган туман (шаҳар) кенгашларининг конференциясида туман мувофиқлаштирувчи кенгаш аъзолари ҳамда вилоят конференцияларида қатнашиш учун делегатлар ва улар орасидан ишончли вакиллар сайланди.

Мазкур конференциялар Президентимизнинг яқинда қабул қилинган «Маҳалла институтини янада такомиллаштириш чора-тадбирлари тўғрисида»ги фармонининг мазмун-моҳиятини, аввало, соҳада меҳнат қилаётган ходимлар орасида кенг тарғиб қилиш, белгиланган вазифаларнинг ижроси юзасидан ўзаро келишиб олиш ҳамда соҳани янада такомиллаштириш учун тегишли янгиликларни жорий қилишда катта аҳамият касб этди.

Туман ҳокими ва унинг ўринбосарлари ҳамда ҳудудий мувофиқлаштирувчи кенгаш аъзолари қатнашган йиғилишларда маҳалла фуқаролар йиғинида ташкил этилган янги лавозимларга малакали, тажрибали ҳамда фидойи кишилар қанчалик жалб қилингани ва бошқа масалалар ҳам кўриб чиқилди.