Вазирлар Маҳкамасининг 2016 йил 30 декабрдаги аҳолига ва бюджет ташкилотларига кўмир маҳсулотлари етказиб беришга оид қарорига мувофиқ, «Ўзбеккўмир» АЖ мамлакатимизнинг барча ҳудудларида жами 84 та кўмир омбори  қурилиши ва брикет ишлаб чиқариш ускуналари билан жиҳозланиши борасида иш олиб бормоқда.

«Ўзбеккўмир» АЖ Бош директори ўринбосари Носиржон Умаровнинг айтишича, мазкур ишларнинг умумий қиймати 45,4 миллиард сўмни ташкил этади. Улар амалга оширилгач, бу кўмир брикетлари ишлаб чиқариш йиллик ҳажмини 800 минг тоннадан ошириш имконини беради.

Жорий йил 1 мартгача «Ўзбекистон темир йўллари» АЖга темир йўл ташувлари учун амалдаги прейскурант ставкаларининг 50 фоизи миқдорида чегирма берилиши ҳисобига аҳолига кўмирнинг чакана нархи 13 фоизга камайтирилди ва бир тонна маҳсулот нархи бугунги кунда 126 минг 400 сўмни ташкил этмоқда.

Вилоятлардаги дистрибьюторлик марказлари раҳбарларига қатъий жавобгарлик юкланади. Агар кўмир нархи асоссиз равишда ошириб юборилган ҳолатлар аниқланса, ўша жойдаги раҳбарларга тегишли чоралар кўрилади.