Пекин, Лондон ва Рио Олимпиадасининг бронза медали совриндори, икки карра жаҳон чемпиони, Осиё чемпиони, кўплаб халқаро мусобақалар ғолиби бўлган дзюдо бўйича Ўзбекистон терма жамоаси аъзоси Ришод Собиров катта спорт билан хайрлашди.

Энди ҳамюртимиз мураббийликда фаолиятини давом эттирадиган бўлди. У терма жамоа мураббийлар штабида ўзи муваффақият қозонган вазн тоифалари (-60 ва -66 кг)да устозлик қилади. Аниқроғи, ушбу вазн бўйича маслаҳатчи мураббий сифатида фаолият юритади.

Таъкидлаш жоизки, Ришод Собиров икки вазн тоифасида Олимпиада совриндори бўлган дунёдаги камсонли дзюдочилардан бири ҳисобланади. У Пекин — 2008 ва Лондон — 2012 Олимпиадаларида -60 килограмм, Риода эса -66 килограмм вазн тоифасида бронза медалини қўлга киритган.