Жазо чоралари кучайтирилишига қарамай айрим фуқароларимиз томонидан ҳамон ўз хонадонларида ёввойи ва йиртқич ҳайвонларни сақлаш ҳолатлари учрамоқда.

Энг ёмони, бу билан ғурурлангандек ижтимоий тармоқларда ўша ҳайвонлар иштирокидаги видеолар билан мақтанишмоқда.

Афсуски, биз табиат қонунларини менсимасликни тўхтатмаяпмиз. Табиатнинг жавобини эса бугунги экологик ҳолатимиз кўрсатиб турибди. Лекин етарлича хулоса чиқармаяпмиз.

Азиз юртдошлар, ҳурматли мутасаддилар, уйда сақланаётган ҳар бир ёввойи жонзот табиат занжирининг бир бўлаги эканини, уни тутқунликда сақлаш орқали табиий мувозанатни бузаётганимизни қачон англаб етамиз? Бемаъни кўнгилхушликларимизни деб ноёб турлар йўқолиб кетиш арафасида турибди.

Ҳатто яқинда партиямиз фракцияси депутатлари ташаббуси билан сақланиши тақиқланган ёввойи ҳайвонларнинг қонунга хилоф равишда сақланишининг олдини олишга оид қонун ҳам қабул қилинди. Масъуллардан мазкур қонун ижроси таъминланиши, ёввойи жонзотларни уйда сақлашнинг олдини олишга қарши кескин чоралар кўришини ва бу ҳақда жамоатчиликка маълумот бериб борилишини сўраймиз.