«Давлат экологик экспертизаси маркази» давлат муассасаси Тошкент шаҳар филиалида айни шу масала муҳокама қилинди.

Экология ва атроф-муҳитни муҳофаза қилишга қаратилган фаолият бугунги кунда мамлакатимизда янги босқичга кўтарилди. Барча соҳа ва тармоқлар ўз фаолиятини ташкил қилишда экологик хавфсизликни таъминлаш ҳамда барқарорликка зарар етказмасликка масъул эканини ҳозирги экологик вазиятнинг ўзи талаб қилмоқда. Шундай бўлса-да, ҳалигача фақат ўз манфаати йўлида – қонун талабларига риоя қилмасдан, тегишли экспертиза хулосасисиз иш ютираётган субъеклар ҳам, афсуски, йўқ эмас. Уларнинг фаолияти экотизимга салбий таъсир кўрсатаётгани ҳаммамизга кундай равшан бўлиб турибди. Улар фаолиятини қонун доирасида ташкил қилишни назорат қилиш, белгиланган экологик меъёрларга риоя этилишини таъминлашда давлат экологик экспертизасининг аҳамияти катта.

Бунинг учун экологик экспертиза ўтказиш ва хулоса беришда қонун устуворлигини таъминлаш, коррупциявий ҳолатлар ва манфаатлар тўқнашувига йўл қўймаслик, хизмат интизомига қатъий риоя этиш талаб қилинади. Экспертлар томонидан тайёрланаётган хулосаларнинг қонуний асосда ишлаб чиқилишига алоҳида эътибор қаратилиши зарур.

«Давлат экологик экспертизаси маркази» давлат муассасаси Тошкент шаҳар филиали мутасаддилари экологик экспертиза хулосасисиз иш олиб бораётган ва бу билан атроф-муҳитга салбий таъсир кўрсатаётган корхоналар фаолияти юзасидан амалга оширилаётган чора-тадбирлар самарадорлигини  таҳлил қилишди. eco-service.uz электрон тизими орқали тақдим этилаётган II тоифага мансуб ҳужжатлар қабул қилинишидаги хатоликларнинг олдини олиш борасидаги ишлар сарҳисоб этилди.

– Экология ва атроф-муҳитни асраш соҳасида амалга оширилаётган ишларда қонуний фаолиятни таъминлаш ҳамда бу борада қатъий назорат ўрнатиш долзарб тус олмоқда, – деди филиал раҳбари Ш.Мўминов. – Бунда, хусусан, хулосасиз ишлаётган корхоналарни аниқлаш ва уларни қонуний асосда экспертизага жалб қилиш ниҳоятда муҳимдир. Биз ўзимизга берилган ваколатлар доирасида ана шу фаолиятни тизимли ва қонуний тарзда йўлга қўйилишига масъулмиз. Экологик экспертизада шаффофликни таъминлаш ҳар биримизнинг бурчимиз эканини унутмаслигимиз зарур.

Шунингдек, коррупциявий ҳолатга йўл қўймаслик, хизмат этикаси қоидаларига риоя қилиш ва экологик экспертиза хулосаларини амалдаги меъёрий ҳужжатлар асосида тайёрлаш лозимлиги таъкидланди. eco-service.uz электрон платформаси орқали қабул қилинаётган лойиҳаларнинг сифатини назорат қилиш, уларнинг атроф-муҳитга таъсирини холис баҳолаш масалаларидаги ишларни тўғри ташкил этиш зарурлиги эслатиб ўтилди.