Куни кеча аҳолининг экологик маданиятини ошириш, жамоат ва давлат ташкилотлари ҳамкорлигини кучайтириш мақсадида Президент қарори қабул қилинди. Унга асосан «2030 йилгача аҳолининг экологик маданиятини юксалтириш концепцияси» ҳамда уни амалга ошириш бўйича «йўл харитаси» тасдиқланди.

Бу муҳим ҳужжат 2030 йилгача аҳолининг барча қатламларида экологик билим ва кўникмаларни шакллантиришни мақсад қилади. Концепцияни ҳаётга татбиқ этишда Экология, атроф-муҳитни муҳофаза қилиш ва иқлим ўзгариши вазирлиги мувофиқлаштирувчи давлат органи сифатида белгиланди.

Концепцияда белгиланган кўрсаткичлар ўз аҳамиятига кўра мустаҳкам экологик пойдевор яратишга хизмат қилади. Хусусан, 3,3 миллионга яқин мактабгача таълим муассасалари тарбияланувчилари, 4,2 миллион ўқувчи ва 400 мингга яқин касб-ҳунар таълимидаги ёшларни экологик тарбия билан қамраб олиш кўзда тутилган. Бу – мамлакат миқёсида экологик онг ва маданиятни кучайтиришга қаратилган аниқ мақсадли ёндашувдир.

Қарорга мувофиқ, давлат идоралари ходимларининг 90 фоизи бепул ўқув курслари орқали экологик билим билан таъминланади. Бу нафақат иш юритиш маданиятини, балки фуқаролар билан экологик масалаларда мулоқотни ҳам юқори босқичга кўтаради. Шунингдек, «Яшил макон» лойиҳаси доирасида ҳар йили 200 млн туп дарахт экилади, минглаб янги боғлар ва яшил белбоғлар ташкил этилади.

Экологик тоза инфратузилмани шакллантириш, ифлосланиш манбаларини назорат қилиш ва жамоатчиликка очиқ маълумот бериш тизими жорий этилади. Биологик хилма-хилликни сақлаш, қаровсиз ҳайвонлар масаласини тизимли ҳал этиш ва жамоатчилик иштирокини таъминлаш режалаштирилган. Шу билан бирга, ҳар бир ҳудуд учун экологик паспорт ва рейтинг жорий қилиниб, қонунбузарлик учун жавобгарлик кучайтирилади.

Қонунчилик органлари ва фуқаролик жамиятининг ҳамкорлиги асосида экологик билимларни оммалаштириш, таълим тизими орқали барқарор ғояларни ёш авлод онгига сингдириш давр талаби бўлиб қолмоқда.

Экопартия фаоллари, депутатлар, барча даражадаги давлат органлари ва жамоатчилик бу жараёнда фаол иштирок этиши лозим. Зеро жамиятда экологик маданиятни шакллантириш – бу умумий вазифа, умуммиллий ҳаракатдир.

Жавлон АБДУЛЛАЕВ,

Олий Мажлис  Қонунчилик

палатаси депутати,

ЎЭП фракцияси аъзоси