Дунё аҳолисининг икки миллиарддан ортиғини, яъни 25 фоиздан зиёдини ёшлар ташкил этади. Мамлакатимизда эса ёшлар қатлами жами аҳолининг қарийб 60 фоизига яқин.

Шунинг учун Ўзбекистон ёшлар мамлакати сифатида эътироф этилади. Яқин ўн йилликларда бу қатлам давлат ва жамият бошқарувида ҳал қилувчи кучга эга бўлишини тасаввур қилсак, ёшлар таълим-тарбияси билан шуғулланиш, муаммоларини вақтида ҳал этиб, шахс сифатида ривожланиши учун барча шароитларни яратиш, профессионал касб маҳоратини шакллантириш сингари вазифалар ғоятда долзарб экани ойдинлашади.

Куни кеча Ўзбекистон Экологик партияси фракциясида ташкил этилган «Ёшларда сиёсий онг ва ҳуқуқий маданиятни шакллантиришда демократик ислоҳотларнинг ўрни» мавзусида бўлиб ўтган очиқ мулоқот ҳам юқоридаги долзарб вазифаларни бажаришга хизмат қилади.

Ўзбекистон Экологик партияси сафида ҳам ёшлар катта куч, партиянинг асосий таянчи ҳисоб­ланади.

2024 йилда парламент ҳамда маҳаллий Кенгашларга бўлиб ўтган сайловларда партиямиздан сайланган депутатларнинг қарийб 10 фоизини ёшлар ташкил этди.

Ўзбекистон Экологик партиясидан сайланган ёшлар парламенти аъзолари эса ёшлар сиёсий фаоллигини ошириш, уларнинг давлат бошқарувидаги иштироки ва жамиятдаги ўрнини мустаҳкамлашда катта фаоллик кўрсатаётган қатламдир.

Яқинда мамлакатимиз Президенти раислигида олимпия ва паралимпия ҳаракатини ривожлантириш, оммавий спортни янги босқичга олиб чиқиш ҳамда аҳолининг жисмоний фаоллигини оширишга бағишлаб бир гуруҳ ёшлар билан ўтказилган очиқ мулоқотда ҳам ёшларнинг ижтимоий-сиёсий жараёнлардаги иштирокига алоҳида эътибор қаратилди. Давлатимиз раҳбари бугунги ёшларимиз орасида бўлғуси сиёсатчилар, депутатлар, партия лидерлари етишиб чиқишига ишонч билдирди.

– Ўзбекистон янги марралар сари олдинга илдамламоқда. Янги давр, янгича руҳ ва истиқболли лойиҳалар ўз самарасини бераётир. Шундай экан ҳар бирингиз фуқаролик позициянгизда қатъий туриб, билимингиз, меҳнатингиз, жасорат ва садоқатингиз билан юрт равнақи йўлида хизмат қилишингиз керак, – деди фракция раҳбари Абдушукур Ҳамзаев.

– Жамиятнинг ҳуқуқий маданиятини юксалтирмасдан, ҳар бир фуқарога қонунга чуқур ҳурмат ҳиссини сингдирмасдан туриб, иқтисодий, сиёсий ва ижтимоий муаммоларни муваффақиятли ҳал этиб бўлмайди, – дейди ЎЭПдан халқ депутатлари Шайхонтоҳур туман Кенгаши депутати, Олий Мажлис Сенати ҳузуридаги Ёшлар парламенти аъзоси Камолжон Хурсанов. – Ўтказилган тадқиқот натижалари жамиятда ҳуқуқий маданиятни юксалтириш, ҳуқуқий онгни юксалтириш борасида ёшлар саъй-ҳаракатларини бирлаштириш зарурлигини кўрсатди. Кенг аҳоли қатламлари орасида конституциявий ҳуқуқларни ёритишга алоҳида эътибор қаратиш лозим.

Ёшлар билан мулоқотда Атроф-муҳитни асраш ва яшил иқтисодиёт йили доирасидаги ишлар, демократик ислоҳотларнинг мазмун-моҳиятини ёшларга етказиш ва уларни сиёсий жараёнларга жалб этиш масалалари ҳақида ҳам сўз юритилди.

– Ҳуқуқий тарбия ҳамиша давлатнинг сиёсат, иқтисодиёт ва ахлоққа нисбатан ўз нуқтаи назарини аҳолига аниқ етказиб беришдаги энг ишончли ва самарали восита ҳисобланган, – дейди Олий Мажлис Сенати ҳузуридаги Ёшлар парламенти раиси Лайло Аслонова. – Ҳуқуқий тарбия муаммолари ривожланган мамлакатларда доимо диққат марказида бўлиб, унинг ҳар битта жиҳати ўсиб келаётган ёш авлод онгига мунтазам сингдириб борилган. Шунинг учун ҳам бугунги каби очиқ мулоқотлар ёшлар учун катта мактаб ҳисобланади.

Ўзбекистон Экологик партияси ёш авлодни сиёсий жараёнларга фаол жалб қилиш, экологик масъулиятни ошириш ва ҳуқуқий маданиятни мустаҳкамлаш йўлида илмий ва амалий тадбирларни йўлга қўйиб, экологик муаммоларни ҳал этишда ёшларнинг инновацион ёндашувларини қўллаб-қувватлашга алоҳида эътибор қаратади.

ЎЭП Марказий Кенгаши

матбуот хизмати