Экология, атроф-муҳитни муҳофаза қилиш ва иқлим ўзгариши вазирлигининг Давлат экологик назорат инспексияси ва ҳудудий бўлимлари ходимларидан иборат тезкор гуруҳ томонидан рейд тадбирлари олиб борилмоқда.

Бухоро вилоятида ўтказилган рейд давомида Ромитан ва Олот туманлари чўл ҳудудларидан саксовул ўсимликлари синдириб олиб кетилаётгани аниқланди. Ҳолат юзасидан маъмурий баённома расмийлаштирилди.

Ромитан тумани ҳудудида аниқланган ҳуқуқбузарлик бўйича 2 нафар фуқарога 18 миллион 750 минг сўм жарима белгиланди ҳамда табиатга 6 миллион 195 минг сўм зарар етказилгани маълум бўлди. Олот туманида аниқланган ҳуқуқбузарлик бўйича эса фуқаро M.А. га 9 миллион 375 минг сўм жарима қўлланилди ҳамда табиатга 5 миллион 250 минг сўм зарар етказилгани аниқланди.

Бундан ташқари вазирлик Навоий вилоятида ҳам экорейд ўтказиб, ҳуқуқбузарлик ҳолатини аниқлади.

Рейд давомида фуқаролар Р.Э. ва К.Ф. томонидан «УАЗ» русумли автомашинада Учқудуқ тумани «Шалхар» ОФЙ чўл ҳудудидан саксовул буталари синдириб олиб кетилаётгани аниқланган. Оқибатда табиатга 10 млн 500 минг сўм зарар етказилган.

Ҳолат юзасидан ҳуқуқбузарларга нисбатан маъмурий баённома расмийлаштирилиб, 18 млн 750 минг сўм жарима белгиланди. Улар жами 29 миллион 250 минг сўм товон тўлайдиган бўлди.

Навоий вилояти экология бошқармаси томонидан жорий йил 1 октабрдан ҳозирги кунгача саксовулга зарар етказиш бўйича 5 та ҳолат аниқланган бўлиб, барча ҳуқуқбузарларга нисбатан Ўзбекистон Республикаси МЖтКнинг 79-моддаси 1-қисми билан маъмурий баённома расмийлаштириган. Умумий жарималар 46 млн 875 минг сўмни, зарар эса 31 млн 500 минг сўмни ташкил этган.