Бразилиянинг Сан-Паулу штатида дарёга саноат чиқиндилари оқизилиши оқибатида 20 тоннагача балиқлар нобуд бўлди. Пирасикаба дарёси био хилма-хилликга эга қўриқланувчи ҳудуддан оқиб ўтади.

Сан-Паулу прокуратураси маълумотларига кўра, мамлакатнинг жануби-шарқидаги Пирасикаба дарёсида 10 дан 20 тоннагача балиқ нобуд бўлган.

Шаҳар атроф-муҳитни муҳофаза қилиш агентлиги директори Адриано Кейрушнинг гапларига кўра, кўрилган зарарни ва атроф-муҳитни тиклаш учун йиллар керак бўлади. Ўлдирилган балиқлар сони ва дарёнинг ифлосланиши биологик хилма-хилликка сезиларли даражада зиён етказган. Ушбу дарё Сан-Паулунинг ёввойи табиатга бой катта ҳудуди бўлиб, унинг ҳавзаси 12 531 км2 майдонни ташкил этади.

«Ушбу қайғули экологик офатнинг жиддий оқибатлари барчани ташвишга солиб қўйди. Маҳаллий балиқчиларнинг хавотирини гапирмаса ҳам бўлади», дейди шаҳар прокурори.

Айни дамда атроф-муҳитга катта зарар етказган заводларнинг иши ўрганилмоқда. Прокурорнинг сўзларига кўра, компанияга жиноий жавобгарлик белгиланишдан олдин, балиқларнинг нобуд бўлишида чиндан ҳам компаниянинг айби борми ёки йўқ, тўлиқ тасдиқ топиши даркор.

Ушбу ҳолатга нисбатан Сан-Хосе компанияси балиқларнинг ўлимига алоқадор эмаслигини айтиб, бу айбловдан бош тортган.

«Заводнинг бу ҳодисага алоқадорлиги ҳақидаги тахминларнинг ҳозирча ҳеч қандай далили йўқ ва бу айблов асосга эга эмас», дейди компания ўз баёнотида.