Қорақулоқ – Ўзбекистон Респуб­ликасининг «Қизил китоб»ига киритилган ноёб тур ҳайвонлар сирасига киради. Шу пайтгача уни фақатгина Тошкент шаҳридаги ҳайвонот боғида учратиш мумкин эди. Бу ерда узоқ йиллик парваришдан сўнг икки жуфт қорақулоқдан тўртта насл олинган, холос.

Табиатнинг мўъжизаси шуки, қорақулоқлар Қорақалпоғистондаги Жанубий Устюрт миллий табиат боғида яшаб келмоқда экан. Яқинда улар миллий боғ ҳудудида ўрнатилган фотоқопқонларга тасвирга тушди.

Ўзининг ажойиб кўринишига эга бу жонивор бутунлай йўқ бўлиб кетиш арафасида турган, мозаик тарқалган кенжа тур ҳисобланади. Қорақулоқлар чўлларнинг барханли ва мус­таҳкамлашган қумли қисмлари, гипслашган текисликлари, чинклар, баъзан чўллашган тоғ этаклари ва тўқайзорларда яшайди. Бу жонивор дунё бўйича жуда кам қолгани боис бир қатор нуфузли ҳайвонот боғларида кўпайтириб келинади. Унинг миллий боғимизда ёввойи табиат қўйнида учраши – бу она табиатнинг ҳайвонот оламига нисбатан мўъжизавий ғамхўрлигидир.

Ринат ТАЖИМУРАДОВ,

Жанубий Устюрт миллий табиат боғи бош мутахассиси