Бутунжаҳон атроф-муҳит муҳофазаси куни халқаро миқёсда нишонланадиган экологик саналар орасида мазмун-моҳиятига кўра ўзгача аҳамият касб этади. Мазкур сананинг халқ орасида «Экологлар байрами», дея юритилишининг ўзиёқ унинг экологик тақвимдаги бош байрам, барча эко саналарнинг асосийси, муқаддимаси эканини исботлайди.

ЎЭП Марказий Кенгаши ташаббуси билан мазкур санага бағишланган кенг қамровли тадбир Тошкент давлат аграр университетида ташкил этилди.

Тадбирда сўзга чиққан ЎЭП Марказий Кенгаши раиси Абдушукур Ҳамзаев, Тошкент давлат аграр университети биринчи проректори Соҳиб Исломов, университетнинг ўқув ишлар бўйича проректори Нарзулло Обломуродов партия томонидан мамлакатда экология ва атроф-муҳит муҳофазаси йўлида илгари сурилаётган ташаббуслар, юртдошларимизда экологик маданиятни янада ошириш ҳамда табиатга зарар етказиши мумкин бўлган ҳар қандай хатти-ҳаракатга нисбатан муросасизлик билан қатъий чоралар кўриш борасида олиб борилаётган ишлар тўғрисида сўз юритиб, бу ишда янада фаолроқ бўлиш зарурлиги, экология – ҳаёт-мамот масаласи эканини таъкидлашди.

Шунингдек, Олий Мажлис Қонунчилик палатаси Спикери ўринбосари, ЎЭП фракцияси раҳбари Хайрулло Гаппоров миллий қонунчилигимизга экологияга оид янги қонунлар қўшилаётгани, уларнинг ижроси бўйича доимий равишда жамоатчилик назоратини олиб бориш зарурлигини айтиб ўтди.

Тадбир доирасида партия томонидан «Энг яхши эковидеоролик» танловининг ғолиб ва совриндорлари ҳамда экологияни яхшилаш йўлида партия билан яқин ҳамкорликда иш олиб бораётган олимлар, журналистлар ва жамоатчилик фаоллари тантанали равишда тақдирланди.

Камолиддин РЎЗИМАТОВ,

ЎЭП МК матбуот бўлими

бош мутахассиси