Хазонрезги мавсуми бошланиши билан аҳоли яна бир муаммога – тўкилган барглар ва кесилган шох-шаббаларнинг ёқиб юборилаётганига дуч келади. Бу ҳолатнинг экология ва инсон саломатлигига етказаётган зарарли оқибати кўпинча эътибордан четда қолади.

Экология, атроф-муҳитни муҳофаза қилиш ва иқлим ўзгариши вазирлиги хазонрезги мавсумида шох-шабба ва тўкилган япроқларни ёқмаслик, агар шундай ҳолатлар кузатилса, зудлик билан тегишли мутасаддиларга хабар бериш кераклиги хусусида аҳолини огоҳлантирди. Бу ҳақда вазирлик матбуот хизмати хабар берди.

Қонунчиликка кўра, тўкилган баргларни ёки шох-шаббаларни ёқиш ҳуқуқбузарлик ҳисобланади ҳамда Маъмурий жавобгарлик тўғрисидаги кодексга мувофиқ базавий ҳисоблаш миқдорининг 10 баробаригача, яъни 3,3 миллион сўмгача жарима солинишига сабаб бўлади.

Шунингдек, сомон ёқилиши сабабли тупроқ унумдорлигининг камайиши оқибатида етказилган зарар миқдори мажбурий тартибда ундирилади.

Вазирлик фуқаролардан бундай ҳолатларга дуч келган тақдирда 11-57 ишонч рақамига қўнғроқ қилиб, хабар беришларини ёки @ecogovuz_bot телег­рам ботига мурожаат қилишларини сўраган.