Кейинги йилларда Хитой ва Марказий Осиё давлатларининг ҳамкорлик алоқалари янги босқичга чиқди. Хусусан, парламентлараро алоқалар янада мустаҳкамланмоқда, сиёсий партиялар ўртасидаги алоқалар кенгаймоқда, ҳар томонлама стратегик ҳамкорлик жадал тус олмоқда.

Хитой Коммунистик партияси, Марказий Осиё мамлакатлари парламентлари ва сиёсий партиялари ҳамкорлигида видеоконференц шакл­да ташкил қилинган «Ўзига хос хусусиятларидан келиб чиққан ҳолда ривожланиш йўлидан қатъий бориш: сиёсий партияларнинг вазифаси ва масъулияти» мавзусидаги учинчи форум ана шундай эътиборли мулоқотлардан бири бўлди.

Мазкур форум жорий йилнинг 25 январь куни бўлиб ўтган дипломатик муносабатлар ўрнатилганининг 30 йиллигига бағишлаб ташкил этилган Марказий Осиё ва Хитой давлат раҳбарларининг видеоанжуман шаклидаги учрашувида эришилган келишувларни бажариш мақсадида ташкил этилган.

Форумда Марказий Осиё давлатлари ва ХХР ўртасидаги 30 йиллик ҳамкорлик якунларига, Президентимиз Шавкат Мирзиёев томонидан илгари сурилган ташаббусларга эътибор қаратилди. Кўп қиррали, шу жумладан, парламентлараро ва сиёсий партиялар ўртасидаги ҳамкорликнинг долзарб масалалари, келгуси истиқболига мўлжалланган устувор йўналишлари юзасидан фикр алмашилди.

Ўзбекистон Республикаси Олий Мажлиси Қонунчилик палатаси Спикерининг биринчи ўринбосари Акмал Саидов ўз нутқида форум иштирокчиларини юбилей сана билан қутлаб, Ўзбекистон ва Хитой ҳамда Марказий Осиё давлатлари ўртасидаги кўп томонлама стратегик муносабатлар, шу жумладан, парламентлараро алоқалар ўтган даврда жадал ва барқарор тус олганини таъкидлади. Шунингдек, форумда юртимиздаги бешта сиёсий партиянинг вакиллари ҳам қатнашди.

Тадбир иштирокчиларининг фикрича, ушбу форум дунёнинг каттагина қисмини эгаллаб турган давлатлар ўртасидаги сиёсий, иқтисодий, ҳуқуқий, маданий-маърифий алоқалар ривож­ланишини янги поғонага кўтаради.

Жумладан, парламентларда қонун ижодкорлиги фаолиятида ҳам қонунларни янада мукаммал ишлаб чиқиш имконияти кенгаяди, партия­лараро алоқаларни янги босқичга олиб чиқади.

Мазкур форум юртимизда фаолият юритаётган сиёсий партияларнинг бевосита хорижий давлатлардаги сиё­сий партиялар билан тўғридан-тўғри мулоқотга киришишга хизмат қилади.

Онлайн учрашувда Марказий Осиё ва Хитой халқларини янада яқинлаштириш, маданий-гуманитар алмашинувларни кенгайтириш масалаларига алоҳида эътибор қаратилди.

Форум якунида Марказий Осиё давлатлари ва Хитой сиёсий партиялари ўртасидаги ҳамкорликни янада мустаҳкамлашнинг муҳим масалаларига доир умумий ёндашувлар ва таклифлар билдирилди.

Хориждаги сиёсий партиялар билан бундай алоқаларнинг ўрнатилгани истиқболимиз учун жуда муҳимдир.