Экологик муаммолар бугунги кунда дунё ҳамжамиятини бирдек ташвишга солмоқда. Иқлим ўзгаришлари, дунёнинг турли нуқталарида содир бўлаётган табиий офатлар, қум бўронлари, чўлланиш ва бошқа экологик ҳалокатларнинг барчаси табиатга бўлган муносабатимизнинг натижаси.

Чунки табиатга қандай муомала, муносабат қилсанг у шундай жавоб қайтариши аниқ.

Пойтахтимиздаги Миллий матбуот марказида Ўзбекис­тон журналистлар ижодий уюшмаси қошида фаолиятини бошлаган Экологик журналистлар кенгашининг 2022 йилги режалари ва экология мавзусини ёритувчи журналистлар олдида турган вазифалар муҳокамасига бағишланган давра суҳбатида шу ҳақида атрофлича сўз юритилди.

Экология масаласи бугунги куннинг энг муҳим ва глобал муаммоларига айлангани ҳеч кимга сир бўлмай қолди. Қаёққа қараманг экология билан боғлиқ қарорлар, фармонлар, уларнинг ижроси бўйича ишлаб чиқилаётган чора-тадбирлар ҳақида гапиришади. Аммо ушбу маълумотларни холис ва ҳақчил қилиб оммага етказиш эса журналистларнинг касб маҳоратига боғлиқ. Ушбу муаммоларни ёритишда уларнинг олдида жуда катта масъулият ва вазифалар турибди. Аммо бу борада журналист ва блогерлар олдида турган энг катта тўсиқлардан бири керакли ахборотни олишдаги қийинчиликлардир. Яъни бугун мутасадди шахслардан экологияга доир маълумотларни, муайян бир муаммо юзасидан муносабатини олиш осон эмас.

Бу ҳақида Xabar.uz сайти мухбири Барно Султонова шундай дейди: «Полиэтилен пакетларнинг экологияга келтираётган зарари бўйича мақола ёзиш жараёнида кўплаб экология билан шуғулланувчи мутасаддиларга мурожаат қилдим. Аммо бирортасидан жўяли жавоб ололмадим. Баъзилари «Отангга бор, онангга бор» қабилида жавоб беришган бўлса,  қолганлари  умуман жавоб бермай қўя қолишди. Экологик муаммолар ҳақидаги мақолалар осмондан олиб ёзилмайди. Бунинг учун мутахассисларнинг, соҳа вакилларининг фикри жуда муҳим».

Экологик муаммоларни ёритишда ОАВ ларнинг фаоллиги ҳар қачонгидан ҳам ошиб бормоқда. Экологик маданият ва тарбияни шакллантиришда айниқса, оммавий ахборот воситаларидан катта куч сифатида фойдаланиш лозим. Аммо биргина ўзимиздан мисол келтирадиган бўлсак, «Оила ва табиат» газетамизда кўтариб чиқилаётган юзлаб экологик мавзудаги танқидий-таҳлилий мақолаларга бирор бир мутасадди давлат ташкилоти ёки экофаоллар муносабат билдиргани йўқ.

Экологик танг вазият ва муаммолар сеники, меники деб ажратилмайди. Она табиат битта. Ер сайёраси ҳам ягона. Экологик муаммолар ҳам бутун башариятга тегишли. Бу экологнинг муаммоси, бу журналистники дейишга асло ҳаққимиз йўқ. Қолаверса, экология борасидаги ҳар қандай муаммолар тезкор ечим ва чоралар кўришни талаб қилмоқда. Умид қиламизки, Экологик журналистлар кенгаши кейинги фаолияти давомида кўзланган мақсадлар сари дадил қадам ташлайди ва экологик муаммоларни ёритишда журналистлар учун таянч бўлиб хизмат қилади.

Саида РУСТАМ