Чет элга жўнаб кетадиган фуқаролар суғурта ҳимоясида бўладими?

Хорижга бориб ишлашни дилига туккан меҳнат муҳожирлари сафи ошса ошяптики, камаймаяпти. Уларнинг ҳақ-ҳуқуқлари ва қонуний манфаатларини муносиб ҳимоя қилишга ҳам жиддий киришилди. Шу аснода хорижга йўл олаётган фуқаро ҳаёти, биринчи навбатда, суғурталанадиган бўлди. Бу хорижга кетаётган фуқарога нима беради?

— Қорақалпоғистон Республикаси, вилоятлар ва Тошкент шаҳрида вақтинчалик меҳнат фаолиятини амалга ошириш учун хорижга чиқаётган фуқароларга қулайлик яратиш мақсадида бахтсиз ҳодисалардан ва табиий икки турдаги миграция бўйича ихтиёрий суғурта турлари ишлаб чиқилган бўлиб, бугунги кунгача 4500 га яқин (республикамиз ҳудудидан ташқарига вақтинча ишлаш мақсадида чиқаётган) фуқаро тиббий суғурта полисларини харид қилган, — дейди «Ўзагросуғурта» акциядорлик жамияти бошқаруви раиси ўринбосари Алишер ЮСУПОВ. — Уларга 550,72 АҚШ доллари тўлаб берилди.

— Агар фуқаро хорижга дам олиш учун борса, унга қанча миқдорда суғурта пули берилиши мумкин?

— Чет элга жўнаб кетадиган барча фуқаро бахтсиз ходисалардан суғурталаниши мумкин. Фуқаро ўша ёқда бирор бахтсиз ҳодисага учраса, унга 10 мингдан 90 минг еврогача суғурта пули берилиши кўзда тутилган. Бунда ишлаш учун четга борадиган меҳнат муҳожирига ҳам ана шу миқдорда маблағ ажратилиши мумкин. Қолаверса, мамлакатимизга тадбиркорлик қилиш мақсадида келган хорижлик сармоядорларнинг маблағи ҳам тўлиқ суғурталанади.

— Аҳоли учун яна қандай янги суғурта турлари ишлаб чиқарилмоқда?

— Тиббиёт йўналишида яратилган яна бир суғурта тури «Соғлиғинг ўз қўлингда» онкология йўналишида бўлиб, бу долзарб муаммони енгиллаштиришга қаратилган. Ушбу полисга эга бўлган шахс касаллик борасидаги ташхисни аниқлаштириш, молиявий жиҳатдан имконияти етмаётган, даволаниш жараёнларини чет элдаги клиникаларда давом эттириш ва албатта, касалликни енгиб ўтишда қатор афзалликларга эга бўлади.