Аҳоли гавжум нуқталарга банкомат ўрнатилиши кўпчиликка қулайлик туғдирди. Албатта, бундан банк ҳам, мижоз ҳам бирдай манфаат кўрмоқда. 

— Бугун юзта банкомат ишлаб турибди, — дейди «Агробанк» АТБ бошқаруви раиси ўринбосари вазифасини бажарувчи Рустам МАМАТҚУЛОВ. — Ноябрь ойида яна 300 та банкомат келтирилиб, зарур нуқталарга жойлаштирилади. Келаси йили улар сони 2 мингга етказилади. Натижада мамлакатимизнинг чекка ҳудудларидаги аҳоли ҳам мазкур хизмат тури билан қамраб олинади.

— Ўзбекистонда нечта фуқарога битта банкомат тўғри келади?

— Ўзбекистонда ҳар 46 минг фуқарога битта банкомат тўғри келади. Албатта, бу кўрсаткич жуда кам. Келажакда банкоматлар сонини ошириш чоралари кўриляпти.

— Битта банкомат қанчага тушади?

— Битта банкомат 12-13 минг доллар атрофида харид қилинмоқда. У ўзини бир йилдан сал кўпроқ вақтда оқлайди.

— Туман, вилоятдаги бошқармалар қанча миқдорда кредит бера олади?

— 300 миллион сўмгача кредитни туман бўлими, 300 миллиондан 1 миллиард сўмгача бўлган кредитни вилоят бошқармасининг ўзи республика аралашувисиз бериш имкониятига эга.

— Теримчиларга терган пахтаси учун ҳақ тўлашда узилишлар бўлмайдими?

— Бу масала ҳукуматимиз назоратида. Бундан ташқари, 2300 нафар банк ходими нақд пулнинг тарқатилишини бевосита кузатиб боради. Мақсад — қонун бузилишига  йўл қўймаслик.

Улуғбек ЖУМАЕВ тайёрлади.