Узун ва қалин киприк ҳар қандай қизнинг орзуси. Бугун сунъий йўл билан ана шундай киприк ҳосил қилиш мумкин.

Бироқ вақтинчалик бу тадбир табиийсини ҳам шикастлайди ва тўкилишига сабаб бўлади. Шунинг учун уларни табиий йўл билан ўстирган маъқул.

Киприкларни ўстиришда махсус ниқоблар фойда беради. Сиқиб олинган карам ёки сабзи шарбатига зайтун мойи қўшиб, енгил аралаштириш лозим. Тайёр малҳам уқаловчи ҳаракатлар билан кўз қовоғига суртилади. Карам ўрнига алое шарбатини ҳам ишлатиш мумкин.

Компресс сифатида қора ёки кўк чой, мойчечак, тирноқгул (календула) ёки бўтакўз дамламаларидан фойдаланилади. Пахта ёстиқчаси дамламада намланиб, кўзларга 15 дақиқа давомида қўйилади. Бу киприк тўкилишининг олдини олади, ўсишини яхшилайди.

Мойли аралашмалар ҳам киприк ўстиришда самарали. Петрушка майдаланиб, унга озроқ алое шарбати ва ўсимлик мойи қўшиб аралашма тайёрланади. Тайёр аралашма билан қовоқлар енгил массаж қилинади. Шунингдек, киприкларни мустаҳкамлаб, ўстириш учун канакунжут мойини суртиш ва бир соатга қолдириш фойда беради. Ухлашдан олдин киприк чизиғи бўйлаб зиғир мойи суртиш киприклар янада соғлом кўринишини таъминлайди. Кўз қовоқлари териси қуруқлиги ва таъсирчанлигини камайтириш, киприк ўсишини тезлаштириб, жило бағишлашда атиргул мойи самарали. Уни суртгач, 15 дақиқа ўтиб, илиқ сувда ювиш лозим.

Интернет материаллари асосида

Ноилахон АҲАДОВА

тайёрлади.