Севимли мева — қулупнай ғарқ пишган палла ҳозир. Унда 5-12 фоиз углевод, лимон, олма кислотаси ва фенол бирикмалар бор. Қолаверса, А, В витаминлари ҳамда темир минераллари мавжуд.

Кўп маҳсулотлар таркибидаги дармондорилар қайта ишлаш жараёнида ўз фойдали хусусиятларини йўқотиши мумкин. Қулупнай таркибидаги фойдали витаминлар эса қайта ишланганда ҳам сақланиб қолади. Қадимда табиблар қулупнайни қабзият, анемия, буқоқ, жигар хасталикларини даволашда ва буйрак фаолиятини яхшилаш, ичакларни тозалаш учун тавсия қилишган.

Музлатгичда сақламанг

Қулупнайнинг яна бир фойдали жиҳати, иммунитетни мустаҳкамлайди. Ортиқча вазнни истамайдиганлар учун ҳам асқатади.

Қулупнайнинг баъзи хусусиятлари айримлар учун фойдали таъсир кўрсатмаслиги мумкин. Таркибидаги кислота сабаб ошқозон-ичак йўлларида касаллиги бор кишилар учун у зарарли. Аллергияга мойиллиги бор, қон босими юқори кишилар ҳам истеъмол қилмагани маъқул. Қулупнайни меъёрдан ортиқ ейиш бир қанча муаммоларни келтириб чиқаришини унутмаслик лозим. Бир кунда ярим килограммгача қулупнай тановул қилиш мақсадга мувофиқ.

Бугунги кунда кўп мевани эрта баҳордан бошлаб кўп учратишимиз мумкин.

Тадқиқотларга қараганда, ўз мавсумидан илгари етиштирилган меваларнинг таркибида фойдали витаминлар жуда кам бўлади ва уларнинг мазаси ҳам аслидек хуштаъм бўлмайди. Қолаверса, етти ёшдан кичик болаларга эртапишар меваларни истеъмол қилиш тавсия этилмайди. Кечпишар қулупнайни кунига 100 граммдан бериш мумкин.

Бу мевани ҳатто музлатгичда ҳам узоқ сақлаб бўлмайди. Агар қулупнай қўшимча кимёвий дорилар ёрдамида етиштирилган бўлса, унда у музлатгич ичида соғлиқ учун жуда зарарли маҳсулотга айланиши мумкин.

Интернет материаллари асосида  тайёрланди.