Бугун қурилиш материалларига талаб катта. Аммо, афсуски, аксарият қурилиш материалларининг нархи жуда беқарор. Айниқса цементни кеча олган нархда бугун тополмайсиз. Нега?

— Нархларнинг баландлигидан кўз юмиб бўлмайди ва сабабини икки омил билан изоҳлаш мумкин, — дейди «Ўзқурилишматериаллари» акциядорлик жамияти бошқаруви раиси Ботир ЗАРИПОВ. — Бугун мамлакатимизда қурилиш, бун­ёдкорлик ишлари жадал олиб бориляпти. Шу кунларда барча турдаги қурилиш материаллари сифатини яхшилаш, нархини мўътадиллаштириш, чўнтакбоп қилиш устида жиддий иш олиб борилмоқда. Ҳозир республикамизда 8 мингга яқин қурилиш маериаллари ишлаб чиқарувчи корхоналар мавжуд бўлиб, улар юздан ортиқ турдаги қурилиш материалларини ишлаб чиқармоқда. Биргина 2017 йилнинг ўзида жамият томонидан 3 триллион 113 миллион сўмлик саноат маҳсулотлари ишлаб чиқарилган.

— Бугун неча турдаги қурилиш материаллари хориждан мамлакатимизга келтириляпти?

— Йил давомида юртимизга 1,5 миллиард долларлик қурилиш материаллари келтирилади. Булар асосан металл, ёғоч маҳсулотларидир. Аслида импорт қилинаётган кўп номдаги хорижий қурилиш материалларининг кўпини ўзимизда ишлаб чиқарса бўлади. 2019 йилга бориб, металл ва ёғочдан бошқа барча турдаги қурилиш материаллари ўзимизда тайёрланади. Бунинг учун имконият етарли.

Бугунги кунга қадар 510 миллиард сўмлик 24 та лойиҳа ишга туширилиб, 1100 та янги иш ўрни яратилди. Хусусан, Самарқанд шаҳридаги «Прайм керамикс» қўшма корхонасида йилига 2-7 миллион квадрат метр керамик плита, ­«Ангрен» эркин иқтисодий зонасида «Нейшнл керамикс» корхонасида 4-5 миллион квадрат метр керама-гранит, «Навоий» эркин иқтисодий зонасида 3-5 минг тонна алюминий профиллари ишлаб чиқариш йўлга қўйилди. Шунингдек, Жарқўрғон, Қора­ўзак ва Қўрғонтепа туманларида юқори сифатли цемент, Нурота, Ўртачирчиқ туманларида ва Қўқон шаҳрида гранит ва мармар тошлардан замонавий қурилиш материаллари, Фориш туманида базальт арматураси ишлаб чиқариш лойиҳаларини ишга тушириш бўйича ишлар амалга оширилмоқда.

— Цементнинг сақланиш муддати қанча?

— Қурилиш материаллари сотилаётган шохобчаларда, цементга қум аралаштириб сотиш ҳолатлари ҳам афсуски, учраб турибди. Натижада маҳсулотнинг сифати, кўринишига путур етади. Негаки, цемент маҳсулоти олтмиш кун давомида қуруқ ва махсус жойда сақланиши керак. Лекин сотувчилар ҳар доим ҳам бу талабга эътибор қаратавермайди.

— Суюқ гулқоғоз (обой)лар қандай маҳсулотдан тайёрланади?

— Суюқ гулқоғоз пахта чиқиндиларидан тайёрланади. Бу маҳсулотнинг сифати, ташқи кўриниши харидорларга манзур бўлмоқда. Қолаверса, ­ пойтахти­мизда май ойидан Германия технологияси асосида гулқоғозлар ишлаб чиқаришга ҳам киришилади ва маҳсулотнинг эллик фоизи хорижга экспорт қилинади.

Улуғбек ЖУМАЕВ,

«Оила даврасида» мухбири