Бугун турли кўринишдаги сақичларни дўконлару дорихоналарда истаганча харид қилиш мумкин. Айниқса, бу эрмак болаларнинг жону дили. Хўш, тинимсиз реклама қилинаётган сақич саломатликка қай даражада таъсир ўтказади?

— Сақични фақат тўқ қоринга чайнаш мумкин, — дейди терапевт Муқаддас ҲАСАНОВА. — Овқатлангандан кейин 15-20 дақиқа сақич чайнаш ҳазмни енгиллаштиради. Айримлар турли ҳидларнинг олдини олиш учун оч қоринга ҳам хушбўй сақич чайнаб юради. Бу кони зарар, чунки ошқозоности бези шираси овқатни ҳазм қилиш вақтида ишлаб чиқарилади, яъни овқатланаётганимиздан бошлаб ишга тушади. Оч бўла туриб сақич чайнасак, бу без «алданади», аслида йўқ бўлган озиқани ҳазм қилиш учун кислота ишлаб чиқара бошлайди. Кислотанинг кўпайишидан ошқозонда яра пайдо бўлади.

— Болалар учун 10-15 дақиқа сақич чайнаш жағ соҳаси учун массаж вазифасини ўтайди, — дейди отаринолоринголог Баҳодир ­РАСУЛОВ. — Бунда меъёрга амал қилиш муҳим. Аммо сақич шу билан ўз ишини якунламайди. Масаланинг бошқа томони ҳам бор. Боғча ёшдаги ва бошланғич синфдаги болалар учун сақич касалликлар ўчоғи. Бу ёшдаги болаларда гигиена қоидаларига амал қилиш кўникмаси ҳали тўлиқ шаклланмагани учун ўртоқлари билан сақич алмаштириб ҳам чайнашади. Оқибатда, бир-биридан турли касалликларни юқтириб олишлари ҳеч гап эмас. Айниқса, болалар оғзидаги сақичини қўлига олиб ўйнаб, уни микробларнинг маконига айлантиргач, яна оғзига солишини кўп учратганман.