Бодрингли ниқоблар турли тери учун бирдек самарали ҳисобланади. Бошқа сабзавотлардан фарқли равишда бодрингни жуда нозик ҳисобланган кўз атрофи терисига ҳам қўллаш мумкин. У кўздаги чарчоқ ва қовоқдаги шишларни бартараф этишга ёрдам беради.

1-ниқоб:

Ниқоб тайёрлашдан олдин бодринг совитгичда сақланган бўлиши лозим. Уни юпқа паррак шаклида тўғраб, қовоқларга 15 дақиқага қўйилади. Бодринг бўлаклари олиб ташлангач, қовоқдаги шишлар анча камайиб, терининг ранги янада ёрқинлашади. 

2-ниқоб:

Бир дона кичик бодрингни қирғичдан ўтказиб, устига бир неча томчи лимон суви солинади. Бу аралашмани маълум муддат совитгичда сақлаш зарур. Тайёр бўлган ниқоб пахта ёрдамида кўз тагига суртилади.

3-ниқоб:

Бодринг ва петрушка аралашмаси ҳам кўз атрофи териси учун жуда самарали таъсирга эга. У терини ёшартиради. Бунинг учун майда тўғралган петрушка ярим соат қайнаган сувга солиб қўйилади. 50 грамм ивитилган петрушкага шунча миқдорда қирғичдан чиқарилган бодринг қўшилади. Тайёр бўлган аралашма юзнинг барча қисмига бир текисда суртиб чиқилади.  

4-ниқоб:

 Майда қирғичдан ўтказилган бодринг, тенг миқдордаги сули ёрмаси ва янги қатиқ билан бир хил қуюқ масса ҳосил бўлгунча аралаштирилиб, юзга бир текис суртилади. Бу ниқоб теридаги ажинларни камайтириб, ўзгача ёрқинлик бағишлайди.  

Эслатма: барча ниқоблар 15-20 дақиқадан кейин илиқ сув билан ювиб ташланади. 

Зиёда НИШОНХЎЖАЕВА

 тайёрлади.