Аҳоли саломатлигини асраш ва шаҳар ҳудудларида қулай экологик муҳитни қарор топтиришда маҳаллалардаги санитария-тозалик ҳолати, чиқиндиларни ўз вақтида зарарсизлантириш ва тизимли бошқариш ҳал қилувчи аҳамиятга эга.

Айниқса, Оролбўйи минтақасининг ўзига хос экологик шароитида ҳар бир кўча ва аҳоли масканининг озодалиги бевосита фуқаролар саломатлиги ҳамда турмуш сифатини белгилайди. Шу нуқтаи назардан, Нукус шаҳридаги «Жеке терек» маҳалла фуқаролар йиғинида навбатдаги экологик ўрганиш ишлари олиб борилди.

Ўрганиш жараёнида Ўзбекистон Экологик партияси Қорақалпоғистон Респуб­ликаси партия ташкилоти раиси Айсанем Бегимова ҳамда Қорақалпоғистон Республикаси Жўқорғи Кенгеси депутати Айжамал Юсупова иштирок этди. Халқ вакиллари маҳалла «еттилиги» билан бевосита мулоқот ўтказиб, ҳудудни ободонлаштириш, қаттиқ маиший чиқиндиларни тўплаш ва олиб чиқиб кетиш тизимининг самарадорлиги ҳамда атроф-муҳитни муҳофаза қилиш борасидаги кечиктириб бўлмас вазифаларни атрофлича муҳокама қилдилар.

Аҳоли мурожаатлари асосида маҳаллада фаолият юритаётган тадбиркорлик субъектларининг фаолияти ҳам кўздан кечирилди. Хусусан, савдо ва хизмат кўрсатиш шохобчаларида ҳосил бўлаётган чиқиндиларни фақат белгиланган махсус майдончаларга жойлаштириш, туташ ҳудудларни озода сақлаш ҳамда маиший чиқиндиларни ўз вақтида олиб чиқиб кетилишини қатъий йўлга қўйиш бўйича тадбиркорларга тегишли тавсия ва кўрсатмалар берилди. Тадбиркорлик фаолияти аҳолининг тоза ва хавфсиз муҳитда яшаш ҳуқуқига дахл қилмаслиги, санитария талабларига тўлиқ жавоб бериши шартлиги таъкидланди.

Ўрганиш давомида айрим ҳудудларда чиқиндиларнинг тўпланиб қолиши билан боғлиқ камчиликлар қайд этилиб, санитария-тозалик ҳолатини зудлик билан яхшилаш, ноқонуний чиқиндихоналар пайдо бўлишининг олдини олиш бўйича масъуллар зиммасига аниқ вазифалар юклатилди. Маҳалла ҳудудида экологик маданиятни юксалтириш, санитария осойишталигини сақлаш ва тизимли тозаликни таъминлашда жамоатчилик назорати ҳамда депутатлик ўрганишлари изчил давом эттирилади.