Яқинда ижтимоий тармоқларда бир видеоролик тайёрлаб, тақдим этилди. Унда ота фарзандини ёнига олиб бир ниҳол экди. Ниҳол бола билан баробар улғайди, ота эса кексайди.

Шунда фарзанд ҳам ўз фарзандини ёнига чорлаб, ўша ўзи эккан дарахт ёнига яна бир дарахтни қадади. Йиллар ўтиб у ҳам улғайди, хуллас бу занжир каби давом этиб, атроф яшилликка бурканиб, дарахтзор пайдо бўлди. Кўчат экиш анъанаси эса отадан-болага ўтиб, давом этаверди.

Бугун юртимизда давом этаётган «Яшил макон» умуммиллий лойиҳаси ҳамда баҳорнинг илк кунидан кенг қулоч ёзган «Яшил йиллик» ҳам боғ яратиш, ҳар қарич ерни кўкаламзорлаштириб, яшилликка буркашдек эзгу мақсадларга йўғрилган. Бу борада нафақат дарахт экиш билан, балки фуқароларга бунинг экотизим учун нечоғлик аҳамиятли эканлигини тушунтириш, тарғиб қилиш, биргаликда келажак учун жавобгарликни англаш ва шу келажакни сақлаш учун ҳаракат қилишга ундаяпмиз.

Албатта, мазкур тарғиботлар, бажарилаётган кенг кўламли ишлар ҳар ерда тилга олиниб, ёшларимиз онгига сингиб бораётир. Ҳар бир хонадонга «Яшил йиллик» шукуҳи кириб бормоқда.

Бугун Бухоро вилояти аҳолиси ҳам мевали ва манзарали дарахтлар ҳамда гул кўчатларини ўтқазиш, парваришлаш каби тадбирларда фаол иштирок этмоқда. Қувонарлиси, кексалар ёшларни ёнига олиб, биргаликда дарахт экишмоқда. Буни қарангки, юқорида биз сўзлаган видеороликдаги каби анъана ҳамон айрим оилаларда мавжуд экан. Бухоро шаҳрида истиқомат қилувчи Абдуллаевлар оиласи азалий урф-одатларимизга таянган ҳолда хонадонда янги чақалоқ дунёга келгани муносабати билан унинг номига дарахт кўчатлари ўтқазишди.

Болажонга атаб кўчатлар экишди, улғайганида мевасидан баҳраманд бўлиб кучга тўлсин, унинг соя-салқинида ўйнаб улғайсин, дея эзгу ниятлар қилишди.

Шу мақсадда ҳовли ва уйнинг ташқарисига ёнғоқ, нок, олма, шафтоли, гилос, каштан каби дарахт кўчатларини ўтқазишди.

Жажжи меҳмон эса ўзига атаб экилаётган кўчатларни кузатиб турди. Ажабмаски чақалоқ ана шундай ерга, ўсимликларга ва табиатга меҳрли, ошуфта қалб соҳиби бўлиб вояга етса.

Албатта, бундай саъй-ҳаракатлар ҳар бир хонадонни, қолаверса, бутун маҳаллани ободонлаштириш ва кўкаламзорлаштириш ишига яқиндан кўмаклашиш, шу билан бирга халқимизга хос эзгу анъаналарни муносиб давом эттиришга хизмат қилади.

Ўзбекистон Экологик партияси

Бухоро вилоят кенгаши

матбуот хизмати