Ўзбекистон Республикаси Вазирлар Маҳкамасининг 2019 йил 27 апрелдаги 360-сонли қарори билан олий таълим муассасаларига қинғир йўллар билан кирганларга нисбатан чора кўрилишига оид меъёр белгилангани ҳақида ҳуқуқшунос-блогер Хушнуд Худойбердиев хабар берди.

Аниқроғи «Олий таълим муассасалари талабалари ўқишини кўчириш, қайта тиклаш ва ўқишдан четлаштириш тартиби тўғрисида»ги низомга қўшимча киритилди ҳамда талабани ОТМдан четлатишга асос бўладиган ҳолатлар рўйхати қуйидаги банд билан тўлдирилди:

«з) суд қарорига кўра кириш имтиҳонларида белгиланган тартибни бузганлиги аниқланганда (ушбу ҳолатда талабалар сафидан четлаштирилганлар талабалар сафига қайта тикланмайди);»

Шунингдек, талабани ОТМдан четлатиш тартибига яна бир ўзгариш киритилди. Эндиликда, талаба ОТМнинг одоб-аҳлоқ қоидаларини бузган бўлса ҳам, уни талабаликдан четлатиш мумкинлиги белгиланди. Илгари мазкур бандда фақат ўқув интизоми ва ички тартиб-қоидалари саналган эди.