Қизларни оилага тайёрлаш, бандлигини таъминлаш, уюшмаган ёшларни ижтимоий ҳаётда фаоллигини ошириш бугун долзарб масала ҳисобланади. Бунга эришиш учун эса яқинда Тошкент шаҳар Хотин-қизлар қўмитаси қошида «Қизларжон» клуби ташкил этилди. Хўш, ушбу клуб фаолияти нималардан иборат? У ўз олдига қандай режаларни қўйган?

— Клубимиз олти йўналишни ўз ичига олган бўлиб, қизларни ижтимоий-сиёсий жараёнларда фаоллигини оширишни мақсад қилган, — дейди Тошкент шаҳар «Қизларжон» клуби раиси Диляра Мелдибекова. — Жумладан, клуб аъзолари «Ўзбекистон қизлари терроризмга қарши» лойиҳаси устида иш олиб боради. Қолаверса, қизларни оилага тайёрлашга ҳам алоҳида эътибор қаратилган. Ҳар бир туманда «Оилага тайёрлаш мактаби» фаолият юритади.

— Бу мактабда, асосан, нималар ўргатилади?

— Оилага тайёрлов мактаби иш билан банд бўлмаган, ҳеч қаерда таҳсил олмаётган уюшмаган қизларни бир жойга жамлайди. У ерда икки ой давомида қизларга таълим берилади, ҳунар ўргатилади. Ўқув мактаби сўнггида қизлар иш билан ҳам таъминланиши кўзда тутилган.

— «Қизларжон» клубига аъзо бўлиш шартлари қандай?

— Ҳеч қандай талаблар қўйилмаган. Унга ўттиз беш ёшгача бўлганлар аъзо бўлиши мумкин. Бир нарсани унутмаслик керак: шу ёшдагиларни қамраб олиш — клубнинг бош вазифаси. Клуб аъзолари учун турли тўгараклар ташкил этилган. Ҳар бир туман Ёшлар иттифоқи кенгашига коллеж бинолари ажратиб берилган. Бу бинолар барча учун қулай жойда жойлашган ва у ерга келиб-кетишда муаммолар юзага келмайди. Тўгаракларимиз ана шу биноларда ўтказилади. Дарслар мутлақо бепул, истаган қиз унга аъзо бўлиши мумкин. Масалан, ҳозиргача Мирзо Улуғбек туманида япон ва инглиз тили бўйича тўгарак очилган. Ёшлар ушбу тўгаракда иштирок этиб, хорижий тилни бепул ўрганишмоқда.

Ноилахон АҲАДОВА

ёзиб олди.