Ўзбекистон Экологик партиясининг замон билан ҳамнафас, элнинг фикри-ўйи, интилишларига ҳамоҳанг, долзарб, нафақат бугунимизни, балки эртамизни ҳам ўйлаб илгари сурилган мақсад ва вазифалари бирма-бир амалга ошаётганига гувоҳ бўляпмиз.

Бу борада Ўзбекистон Экологик партияси Қашқадарё вилоят, туман (шаҳар) кенгашлари томонидан «Яшил тараққиёт учун курашамиз!» шиори остида болалар боғчалари, мактаб, ўрта махсус ва олий ўқув юртларида ёшларда экологик онг ва маданиятни тарбиялаш мақсадида доимий тарғибот тадбирлари ўтказилмоқда. Тадбирлар давомида атроф-муҳитни муҳофаза қилишда ёшларнинг ўрни ва ролини ошириш, улар иштирокида тарғиботни янада кучайтириш, янги инновацион лойи­ҳалар яратиш ва уларни амалга ошириш борасида фикрлар тингланади. Шунингдек, партияга аъзо бўлиш истагидаги йигит-қизлар кундан-кун кўпаймоқда.

Ана шундай иқтидорли ёшлардан бири – Ҳулкар Исомиддинова.

Ҳулкар Исомиддинова Тошкент ирригация ва қишлоқ хўжалигини механизациялаш муҳандислари институти миллий тадқиқот университетининг Қарши ирригация ва агротехнологиялар институти 3-курсида таҳсил олади. У вилоятдаги фаол ёшлардан бири. Университетда Экология ва атроф-муҳит муҳофазаси йўналишида аъло баҳоларга ўқиш билан бирга, кўплаб лойиҳалар муаллифи, грантлар соҳибасидир.

Партиямизнинг ёш аъзоси бўш вақтида компь­ютер технологияси ва дастурлаш соҳаси бўйича билимларини ошириб боради. Қизиқишлари самарасини 2022 йилда 4 та дастурий сайт яратиб, Ўзбекистон Республикаси Адлия вазирлиги томонидан гувоҳномани қўлга киритганида кўриш мумкин.

Шунингдек, 2023 йилда «Меҳнатсевар» лойиҳасида қашқадарёлик келажак касбларини мукаммал ўрганиш истагида бўлган турли соҳаларда фаол, иқтидорли ёшлар учун махсус молиялаштириладиган тўлиқ грантни ҳамда Қашқадарё вилоят ҳокими томонидан эълон қилинган «Хорижий тил билан ITга йўл» грантини қўлга киритди. Шу йилда Google лойи­ҳасини бошқариш (Google project management) бўйи­ча 6 та курсни муваффақиятли тамомлаб, халқаро CURSERA сертификатига эга бўлди.

– Юртимизнинг ҳар қарич ери олтинга тенг, – дейди Ҳулкар Исомиддинова. – Гўзал табиатимиз, мусаффо ҳавомиз, зилолдек тиниқ ва шифобахш сувимиз ҳар қандай кишини ўзига мафтун этади. Она заминимиз туҳфа қилган бетакрор гўзалликни асраб-авайлаш, келажак авлодга бус-бутунлигича етказиш сизу бизнинг бурчимиз.

Қувонарлиси, партиянинг кўпмингсонли Ёшлар қаноти аъзолари ўз тенгдошларини вилоятимиздаги экологик муаммоларни бартараф этиш, олдини олиш ҳамда атроф-муҳит мусаффолигини сақлашда фаол бўлишга чорлайди. Биргаликда бажариладиган амалий ишлар эса ҳали олдинда.